السلام عليكم ورحمة الله وبركاته
والصلاة والسلام على حبيبنا ونبينا محمد وعلى اله وصحبه
دي اجابة لشوية تساؤلات عن اختبار الحمل المنزلي يارب تفيدكم
لماذا اختبار الحمل المنزلي
عند التصاق البويضة المخصبة بجدار الرحم وده بيحصل بعد ايام من التخصيب
تبدا المشيمة بارسال كمية كافية من هرمون الحمل للدم ومن الدم للبول والاختبار ده وظيفته انه يكشف عن وجود هرمون الحمل في البول
كيفية عمل اختبار الحمل المنزلي
عينة بول بتاخذ ويوضع فيها اداة الاختبار لتكشف عن وجود هرمون الحمل من عدمه
كيف اعرف شكل النتيجة الايجابية ؟
الاداة فيها مكان مرسوم عليه شرطة لو ظهر جنبها شرطة تانية زيها يبقى النتيجة ايجابية
طيب لو في حمل امتى بتظهر نتيجة ايجابية في اختبار البول المنزلي ؟
بعد حوالي من 11 الى 18 يوم من تاريخ التبويض
طيب برده مش فاهمة امتى تطلع نتيجة ايجابية يعني ممكن قبل الدورة ؟؟
اغلب شركات اختبار الحمل المنزلي بتحاول تقنع السيدات انه بيطلع نتيجة قبل ميعاد الدورة
لكن الحقيقة ان بس 25 % من السيدات ممكن تطلع عندها نتيجة ايجابية قبل ميعاد الدورة بيومين و 40 % قبل الدورة بيوم واحد
ايه هو افضل ميعاد ؟؟
لما الدورة ما تجيش اي غياب الدورة
وامتى افضل وقت خلال اليوم لعمل الاختبار؟
عند اول دخول للحمام في الصباح
وده لان البول بيكون مركز فبتكون نسبة الهرمون واضحة اكتر
هل ممكن يظهر سلبي وفي حمل ؟
الاختبار ده نسبة دقته 98 %
فممكن ده يحصل بس قليل جدا
يعني لو سلبي وشاكة ان في حمل اعيد الاختبار امتى ؟
بعد 3 ايام وقت كافي ان نسبة الهرمون تتضاعف
ولو انا اخدت ابرة تفجيرية امتى ممكن اعمل الاختبار ؟
الابرة التفجيرية هي هرمون زي هرمون الحمل ولكنه صناعي
الهرمون ده بيعد في الجسم من 12 الى 14 يوم وممكن اكتر
وطبعا لو الاختبار اتعمل في المدة دي ممكن يدي نتيجة ايجابية غلط
عشان كده يفضل ان بعد اسبوعين او حتى بعد 20 يوم من اخذها يتعمل الاختبار المنزلي عشان نطمن ان الهرمون خرج من الجسم ولو في هرمون حمل يبقى هرمون الحمل الطبيعي وتكون النتيجة صحيحة ان شاء الله
